NepalBani FM

कात्तिक २३ देखि इलाममा सन्तोष अधिकारी मेमोरीयल कोशी प्रदेश चेस प्रतियोगिता

गणेश घिमिरे
कात्तिक १३, इलाम
प्रतियोगिता संख्या आधार मान्ने हो भने बुद्धिचाल नेपालको सक्रिय खेलमा पर्छ । पछिल्लो पाँच वर्षयता बुद्धिचालका घरेलु प्रतियोगिता थपिँदो छ । यो खेलमा पछिल्लो युवा पुस्ताको आकर्षण बढ्दो छ । तर यस खेलको बिस्तारसंगै खेललाई प्रबद्र्धन गर्दै ब्यबसायिक बनाउनका लागि भने तीनै तहको सरकारले अन्य खेललाई जस्तो महत्व भने खासै दिने गरेको छैन । पूर्वी पहाडी जिल्ला इलाममा पनि बुद्धिचाल खेल फस्टाउँदै गएको छ ।

जिल्लामा खेलाडीको संख्या बढेको छ, तर स्तरीय प्रतियोगिता अत्यन्त कम र स्थायी प्रशिक्षकको अभावले खेलाडीको स्तर भने बढ्न सकेको छैन । यसैक्रममा इलाममा चेस खेललाई स्तरीय बनाउँदै लानेगरी जिल्ला बुद्धिचाल महासंघ इलाम र कोशि प्रदेश बुद्धिचाल महासंघ सक्रिय छ । जिल्लामा स्तरीय प्रतियोगिता गराउन कोशि प्रदेश महासंघ लागि परेको हो । आउँदो कात्तिक २३, २४ र २५ गते इलाम सदरमुकाममा सन्तोष अधिकारी मेमोरीयल कोशी प्रदेश रेटिङ चेस प्रतियोगिता सञ्चालन हुने भएको छ । स्वर्गिय सन्तोष अधिकारी इलाम नगरपालिकाका स्थायी बासिन्दा हुनुन्थ्यो । उहाँ इलामका चेस खेलाडी हुनुन्थ्यो । कोशी प्रदेश बुद्धिचाल महासंघको आयोजना र जिल्ला बुद्धिचाल महासंघ इलामको प्राबिधिक सहयोगमा प्रतियोगिता हुन लागेको हो । प्रतियोगितामा बिभिन्न ९ देखि १० वटा बिधामा खेल हुनेछ । खुल्ला, बिद्यार्थी, अनरेटेड, भेट्रान, महिला, १४ सय बिलो, हिल्स च्याम्प, डिसेबल, रेटेड इलाम, अनरेटेड इलाम, १६ बर्ष मुनिको इलाम, उत्कृष्ट बिद्यालय, इमर्जिङ प्लेयर इलाम (पुरुष र महिला) बिधाका पहिलो दोस्रो हुनेलाई पुरस्कार प्रदान गरीनेछ । खुल्ला बिधाबाट पहिलो देखि दशौं हुने सम्मले पुरस्कार पाउनेछ । जसमा प्रथम, दोस्रो, तेस्रो, चौथो, पाँचौ, छैठौं, सातौं, आठौं, नवौ र दशौ हुनेले क्रमश ३५ हजार, २५ हजार, १५ हजार, १० हजार, ८ हजार, ७ हजार, ६ हजार र ५÷५ हजार रुपैंयाँ पाउनेछन् ।

यस्तै बिद्यार्थीतर्फ पहिला र दोस्रोले क्रमश ५ हजार ४ हजार, अनरेटेड, भेट्रान र महिला तर्फको बिधामा पहिलो र दोस्रो हुनेले क्रमश ५ हजार र ४ हजार रुपैंयाँ पुरस्कार प्राप्त गर्नेछन् । यस्तै रेटेड इलाम बिधामा पहिलो, दोस्रो, तेस्रो र चौथो हुनेले क्रमश ५ हजार, ४ हजार, ३ हजार र २ हजार रुपैंयाँ पुरस्कार प्राप्त गर्दा, अनरेटेड इलाम बिधा, १६ बर्ष मुनि इलाम बिधा र बेष्ट बिद्यालय इलाम बिधामा पहिलो र दोस्रौ हुनेले क्रमश ३ हजार र २ हजार रुपैंयाँ पुरस्कार पाउनेछन् । यस्तै १४ सय बिलो, हिल्स च्याम्प, डिसेबल बिधाको पहिलो हुनेले ५÷हजार रुपैंयाँ पाउँदा इमर्जिङतर्फ एक÷एकजना महिला र पुरुषले ३÷३ हजार रुपैयाँ पुरस्कार प्राप्त गर्ने आयोजक कोशि प्रदेश बुद्धिचाल महासंघले जनाएको छ । सदरमुकामको सुरन्दर रमणिय स्थल चियाबारीमा हुने प्रतियोगिता स्विस लिगको नियममा खेलाइनेछ । प्रतियोगितामा सहभागिता जनाउन एक र ५ सय रुपैंयाँ बुझाउनुपर्नेछ । ७ देखि ८ राउण्डमा खेलाइने प्रतियोगिताको प्रमुख आर्बिटर एफए दिपेश गिरी रहनुहुनेछ ।

इलाममा खेल पर्यटनको बिकास संगै चेस खेलमा आकर्षण गराउनका लागि पनि यस प्रतियोगिता राखेको आयोजक कोशि प्रदेश बुद्धिचाल महासंघका अध्यक्ष सुरेन्द्र राईले बताउनुभयो । चेस विगतको जस्तो छैन । अग्रजले किताब पढेर चेसका कुरा सिक्ने गर्थे । अहिले चेस प्रविधिसँग नजिक छ । नयाँ पुस्ताका खेलाडी धेरै क्षमतावान छन् । अब नेपालमा चेस एकेडेमी आवश्यक भइसकेको अध्यक्ष राईको भनाई छ । यसका लागि सरकारको लगानी अत्यावश्यक छ ।